農曆新年禁忌你知幾多

信則有，不信則無

早前英國BBC和衛報介紹中國賀年食譜，但相片嘅背景裝飾竟然擺有殯儀用品「金銀」同「吉儀」，徹底地「紅白相沖」，認真「大吉利是」！

‍

臨近農曆新年，雖然新一代經常話「百無禁忌」，但傳統節日有齊家中長老，即老人家同阿爸阿媽，新年流流唔想得罪佢哋，知多少少都無壞，的確有啲新年禁忌建議大家「不宜」做，例如開口埋口唔好「死、死聲」、「唉、唉聲」、以及最棹忌嘅紅事喜慶錯誤加入白事元素，到時盞被人「開年」。

‍

正所謂「信就有，不信則無」
以下係部分農曆新年禁忌，當知多少少無壞：

禁忌一：買鞋

老人家一定話正月「唔 可 以 買 鞋」！因為「鞋、鞋」聲就好似「唉」！新年當然唔好唉聲歎氣，無釐神氣，財神見到都調頭走啦。所以，你想著新鞋拜年，最好過年前就好買定。

‍

禁忌二：打掃

新年期間唔好大掃除。皆因掃地、灑水，倒垃圾等清潔工作都被視為會掃走財神同好運，所以家中長老都會喺新年前完成屋企大掃除，即所謂「年廿八，洗邋遢」。不過，家陣無晚市堂食，大家都要買外賣或喺屋企煮飯食，倒垃圾係必需啦。亦相傳大掃除掃地都有規矩，要由屋裡面向門口掃出，意味著將屋企唔好嘅嘢通通掃走。

禁忌三：拖債

長老有云：「做人唔好『債過年』！」無論你爭人錢定人爭你錢，都要喺新年前清走呢筆舊債，做到不拖不欠。因為傳統習俗上，如果將舊債帶過年，意味著新一年都會一直爭人嘢，絕對係壞習慣。所以，喺新年前清債係寓意著一切重新開始。

‍

禁忌四：洗頭沖涼

年初一唔好沖涼洗頭。今次又係諧音「洗、洗」聲好似「死、死」聲；而頭髮嘅「髮」字又同發財嘅「發」字同音，所以沖涼洗頭都被視洗走啲「財」，意頭唔好。 不過家陣疫情，個人衛生始終最重要。

‍

禁忌五：食粥

年初一食粥會被長老罵？因為舊時係窮人無錢煮米飯先至要食稀粥；另一個講法係大年初一食粥就會「窮足一年」。

‍

禁忌六：用利器

利器帶有「破」嘅意思，所以新年用利器會有「破財」、「破運」嘅寓意。大家大年初一盡量唔好剪頭髮，避免一個字——「破」！

禁忌七：赤口拜年

初三又稱為「赤口」，相傳赤口日帶「凶」，會有唔吉利事情發生，又容易同人鬧交，所以初三「赤口」不宜拜年。咁初三啲人通常去邊？咪去晒車公廟行大運。

拜完年，最緊要開工大吉！

而初七又稱為人日，社職預祝每一位人日快樂。

2022年身體健康，一家齊整。

新一年想行善？

>> 2022年全港賣旗日 <<

>> 社職義工機會推介 <<

‍

相關文章：

>> 什麼是廿四氣節？ <<

‍