港島一日遊|18區Chill Chill 香港好去處 x 社職文化系列

港島一日遊

社職文化系列之18區Chill Chill(香港好去處)

第二回:香港離島好去處 x 港島好去處

>> 新界一日遊 <<|>> 港島一日遊 <<|>> 九龍一日遊 <<|>> 離島好去處 <<

今回到港島一日遊,4條建議路線畀你參考,適合所有香港人去行下,繼續認識下香港文化同靚景,Let's GO!

港島好去處
東區、中西區、灣仔、南區

東區一日遊-一路向「東」

港島東區既係住宅區,亦係一個商廈林立嘅地方,除咗有著名筲箕灣東大街美食街各種小食之外,仲有一個睇櫻花好去處;另外更有一個有貓陪你睇書嘅方,啱晒貓奴們去朝聖!

第1站:美食掃街-筲箕灣東大街
第2站:鰂魚涌公園
第3站:北角舊書店玩貓之旅

東區好去處一:筲箕灣東大街

筲箕灣東大街絕對係港島區著名美食街之一,你可以喺到食盡本地街頭小食,並可以試下充滿異國風味嘅美食。班戟、雞蛋仔、格仔餅、千層蛋糕、韓國菜、泰國嘢……一條筲箕灣東大街齊晒!

  • 地址:筲箕灣東大街76A號
  • 交通:港鐵筲箕灣站 B1 出口,步行約1分鐘

東區好去處二:鰂魚涌公園

行商場行到悶,不如去鰂魚涌公園行個圈?鰂魚涌公園係香港賞櫻熱門地點之一(非常罕有),康文署於2015年喺鰂魚涌公園種咗11棵櫻花樹,吸引大批賞櫻人士嚟觀賞兼打卡,風頭一時無兩。唔係賞櫻季節都好,你都可以喺鰂魚涌公園附近嘅海濱長廊散步睇維港景色;同時,亦推薦大家去參觀附近嘅葛量洪號滅火輪展覽館,由已退役嘅滅火輪葛量洪號改造而成,仲可以參觀展覽館了解香港海事消防歷史及基本海上救援知識。

  • 地址:鰂魚涌公園第一期
  • 開放時間:(鰂魚涌公園)24小時/(葛量洪號滅火輪展覽館)10:00-18:00
  • 交通:港鐵太古站E1出口 / 鰂魚涌站B1出口

東區好去處三:森記圖書公司

呢間北角舊書店並唔係普通書店,呢到除咗收藏過萬本舊書之外,更有超過30隻貓貓喺到陪你睇書。想像下,你一邊睇書,一邊睇貓,人生原來可以咁寫意,啱晒愛睇書又愛貓嘅你!不過,睇還睇,千祈唔好打擾各位貓大哥大姐訓覺,亦要留心唔好踩到佢哋!

  • 地址:北角英皇道193號地庫19號英皇中心
  • 開放時間:13:00–22:00
  • 交通:港鐵炮台山站B出口,步行約5分鐘

中西區一日遊-行轉Cafe睇畫睇日落

中環、西環、上環一帶cafe雲集地方,有modern又有vintage style,食個早餐開始新一日就啱晒;附近仲有唔少社區藝術項目同gallery,成個藝文蘇豪小區畀你慢慢行、影下相。路線去到尾,你仲可以去一個隱世泳棚吹下海風,欣賞日落,夠晒Relax。

第1站:中西區Cafe
第2站:藝里坊 ARTLANE
第3站:沙灣徑(隱世泳棚)

中西區好去處一:中上環Cafe

A morning without coffee is like sleep!想有一個開心朝早,你一定要食返個豐富早餐,嘆杯靚咖啡!中西區有唔同風格嘅Cafe,有得食,有得飲,環境仲要唔錯!呢到建議幾間畀大家:

順逆珈琲酒館(呢間係純素!)
  • 地址:上環荷李活道192號地下A舖
半路咖啡
  • 地址:上環摩羅上街26號華冠大廈地鋪
吾子廚房
  • 地址:西環西營盤第二街6-8號德明樓地下A號舖
Bluebird coffee
  • 地址:西環西營盤德輔道西103號樂基商業中心地下B號舖
So high coffee bar
  • 地址:西環西營盤高街49號地舖

中西區好去處二:藝里坊

喺上環食完可以留喺上環慢慢行;喺西營盤嘅朋友可以去雲集本地同國際知名藝術家嘅壁畫藝術「藝里坊」(ARTLANE),一個屬於舊區重建計劃延伸嘅社區藝術項目。呢條ARTLANE概念嚟自紐約曼克頓Soho街頭藝術、倫敦北部舊住宅區Chalk Farm以及韓國梨花洞等壁畫村,將藝術融入生活成為著名景點;所以,你喺藝里坊會見到好多靚畫,包括《Transformation》、《壁畫隧道》、《動物小鎮》、《彩虹樓梯》、《維也納音樂小鎮》、《都市森林》、《澆花中的小女孩》、《音樂藝術之樂》、《紅葉》、《經典荷里活傳奇人物》等。

  • 地址:西營盤奇靈里、石棧里及忠正街一帶
  • 交通:西營盤港鐵站B3出口即達

更多資訊 >> ARTLANE

中西區好去處三:沙灣徑

最後一站走到沙灣徑,呢到最出名當然係一條長碎石灘加隱世泳棚。大家不妨嚟呢到漫步放鬆,吹下海風,觀賞日落,夠晒PEACEFUL。(想影泳棚記得留意潮汐時間。)

  • 交通:堅尼地城A出口,小巴總站乘搭58號小巴,於大口環根德公爵夫人兒童醫院站落車,向海邊方向前行約1至2分鐘就會見到碎石灘,其右邊係沙灣泳棚。

灣仔一日遊-灣仔的歷史足跡

灣仔有歷史建築物,除咗和昌大押,仲有一間「華佗醫院」。囍帖街不再,今日嘅利東街啱唔啱你口味呢?附近唔只得漢堡包之外,行多幾步仲有一個「小歐洲區」,你知唔知喺邊呢。

第1站:和昌大押
第2站:洪聖廟
第3站:日街、月街、星街
第4站:藍屋
第5站:利東街

灣仔區好去處一:和昌大押

和昌大押係一座樓高四層嘅百年古蹟:前身當舖、一條長廊式陽臺將四幢舊式唐樓連成一排。呢種罕見陽臺設計令和昌大押成為香港二級歷史建築,並於2007年進行復修及翻新工程。目前,和昌大押內有多間商店之外,樓上3層分別係高級英式酒吧及餐廳「The Pawn」。

  • 地址:香港灣仔莊士敦道60至66號
  • 交通:灣仔港鐵站A4出口,路程約需4分鐘

灣仔區好去處二:洪聖廟

灣仔洪聖廟係香港一級歷史建築,亦係每年提供驚蟄打小人活動嘅廟宇之一。

  • 地址:香港皇后大道東129號
  • 開放時間:09:00-17:00
  • 路線:以下係由和昌大押前往洪聖廟方法,路程約需1分鐘

灣仔區好去處三:日街、月街、星街

參觀完和昌大押和洪聖廟後,你可以去日月星街飲杯咖啡,食個Lunch抖一抖。日月星街帶歐洲Styke,所以被稱為「小歐洲區」,呢到有唔少特色Cafe任你揀。

  • 路線:以下係由洪聖廟前往日月街星街,路程約需5分鐘

灣仔區好去處四:藍屋

被列為香港一級歷史建築嘅藍屋,其原址其實係一間醫院:1872年政府差餉徵收冊中名為「華佗醫院」(亦稱「灣仔街坊醫院」)。1920年代拆卸後興建成一座四層高建築物。多年嚟,藍屋嘅用途非常多變:曾經由一間醫院變成一間廟、再變成一間武館、醫館、學校、雜貨店、住宅等。2017年,藍屋獲聯合國頒發亞太區文化遺產保育保護獎最高榮譽嘅卓越大獎,係香港首次奪得同類獎項。喺呢到你可以參觀、買紀念品。

  • 地址:灣仔石水渠街72至74A號
  • 開放時間:12:00-24:00
  • 路線:以下係由日月街星街前往藍屋方法,路程約需有9分鐘

灣仔區好去處五:利東街

「就似這一區,曾經稱得上美滿甲天下」……無錯,利東街前身正是囍帖街,係香港舊時印刷品製作及門市集中地,最出名當然係印囍帖。經歷政府市區重建計畫,於2016年變成一個具歐洲風情嘅步行購物街,有好多本地及外國名牌同潮流品牌商店。有得食、有得買,幾方便。

  • 地址:香港皇后大道東129號
  • 路線:以下係由由藍屋前往利東街方法,路程約需4分鐘

南區一日遊-户外數碼之旅

港島南區畀你望住個海漫遊海濱公園,亦可以到沙灘享受海風同陽光;想洗錢買下嘢,仲有一個市集畀你揀。呢個南區路線,啱晒鍾意戶外曬太陽嘅你。

第1站:數碼港海濱公園
第2站:淺水灣沙灘
第3站:赤柱

南區好去處一:數碼港海濱公園

數碼港海濱公園佔地約50,000平方米,一大片草地,啱晒大家喺到野餐,曬下太陽;同時,數碼港海濱公園亦係寵物公園,你可以帶埋愛犬嚟散步同識朋友,享受天倫樂。

  • 地址:香港數碼港道100號
  • 開放時間:07:00-23:00
  • 交通:乘搭以下巴士或小巴前往數碼港,於數碼港公共運輸交匯處落車,步行約6至10分鐘到數碼港海濱公園
  • 巴士:30X(中環至數碼港(循環綫))、42C(北角至數碼港)、73(赤柱至數碼港)、73P(香港仔至數碼港)、107P(紅磡至數碼港)、970(蘇屋邨至數碼港)
  • 專線小巴:10(銅鑼灣(謝斐道))、10P(銅鑼灣)、 58(香港仔﹣數碼港﹣西環)、58M(貝沙灣-數碼港-港鐡堅尼地城站)、 69(鰂魚涌(船塢里)(循環線)) 、69A(香港仔)、69X(銅纙灣(駱克道))

南區好去處二:淺水灣沙灘

水清沙幼,設備齊全,有沙灘排球場畀你玩。想可以進行不同類型嘅活動,如果你鍾意較靜態嘅活動,可以選擇在沙灘散步或者曬太陽,如果你鍾意較動態的活動,亦可以選擇游水或者使用沙灘設有的沙灘排球場,大家可自備排球,同朋友打球,相信大家可以在淺水灣沙灘渡過難忘嘅假日!

  • 地址:淺水灣海灘道
  • 開放時間:(泳灘救生員當值時間)星期一至五:09:00-18:00;星期六、日及公眾假期:8:00-19:00
  • 交通:港鐵中環站去淺水灣交通-中環交易廣場中心乘搭6、6A、 6X、66或260號巴士 (淺水灣站落車)

南區好去處三:赤柱

嚟到赤柱,你可以去泳灘游水、玩獨木舟同直立板;你亦可以到赤柱市集行勻各條本地特色小巷,買下皮革、手工藝同工藝品等;行到肚餓,可以直入赤柱大街,搵間啱Feel餐廳坐低食下嘢,飲下酒;再行入啲到赤柱廣場附近,隨時撞正音樂表演或者主題市集;最後,當然唔少得喺美利樓同卜公碼頭影相。

  • 地址:赤柱
  • 開放時間:(泳灘救生員當值時間)星期一至五:09:00-18:00;星期六、日及公眾假期:8:00-19:00
  • 交通:
    港鐵香港站D出口行到中環交易廣場巴士總站搭乘6、6A、 6X、66或260號巴士,於赤柱廣場或赤柱村站落車
    港鐵銅鑼灣站F1出口行到渣甸街,搭乘40號專線小巴,於赤柱市集落車
    尖沙咀廣東道新港中心外搭乘973號巴士,於赤柱廣場落車

18區Chill Chill 一日遊路線補充

  • 路線規劃之行程由義工協助進行搜集,並非任何商業宣傳
  • 路線規劃之行程只為建議路線,參加者可按照心情自行更改路線或行程
  • 實際路程和交通時間或與描述不同,資料只供參考
  • 所有路線資訊以官方公布作準

其他社職文化系列

>> 18區Chill Chill-離島好去處推介

>> 18區Chill CHill-港島一日遊路線推介

>> 18區Chill Chill-九龍一日遊路線推介

>> 宗教放題-香港廟宇一日遊

>> 宗教放題-本地佛寺及教堂一日遊

香港仲有好多活動畀你揀,立即下載「社職Event GO!-香港活動資訊及報名平台」

社職活動app下載 - Social Career Event Go APP

>>iOS APP<<>>Android APP<<

繼續留意社職有咩最新好玩活動!