聽到某啲聲音，你會聽到個頭皮痲痺？直情會毛管戙但又好治癒？呢種難以形容嘅感覺叫「ASMR」（Autonomous sensory meridian response），即自發性知覺高潮反應，又俗稱「大腦高潮」。因為當聆聽者接收既定聲音之後，腦就會有快樂感覺，甚至頭皮發麻，有一種令人放鬆、極舒壓感覺！有啲人更會聽住ASMR片瞓覺，有安眠作用。到底ASMR片有咩魔力？
炒雪糕（Rolled Fried Ice-cream）Youtube Channel。除了常見朱古力、生果之外，師傅用盡意想不到材料做炒雪糕，包括冰、汽水、薯條、燈籠椒等，色彩繽紛，多元化聲音，ASMR之餘，更有視覺享受，極之過癮！
食嘢「㗩㗩聲」有人覺得好annoying，但有人覺得好治癒。有一班youtuber更加將食變成擁有不同Gimmick嘅ASMR片（Mukbang片）：顏色系食物、巨大化食物、邊煮邊食、炸物系列、糖果系列等等。你以為食得多就一定係肥？錯了，今次介紹兩位型男，身形勁Fit，而且食量勁人，兩位各自嘅「㗩㗩聲」都有唔同style，留意下。唔鍾意睇男仔都得，可以介紹Boki你識。
日日返工，有咩聲音係最令你relax？相信一定唔係電話同Boss Voice。曾經有Office Secret話對付勁嘈同事，就係用青軸Keyboard（青軸聲 >>睇片）。不過，Keyboard有多種，有啲鍵盤聲的確可以令人感到放鬆。
將鮮艷顏色嘅沙，用刀切、用匙羹刮、用木壓，發出各種極治癒聲音。每條片嘅擺設、沙嘅形狀極之工整，所以呢條Youtube Channel唔只適合鍾意ASMR片嘅人，更加適合強迫症朋友。
相信有返咁上下年紀嘅朋友，一定識畫家Bob Ross。同一個髮型、同一件恤衫、同一條牛仔褲、同一個背景，同一把畫刀，陪伴過唔少人成長。但最令人懷念，係Bob Ross把磁性聲音，有人覺得好親切、有人覺得好Sexy、有人覺得好安心。雖然，Bob Ross離開咗大家都十幾年，不過佢嘅教畫節目「The Joy of Painting」一直Loop，甚至喺Twitch都有Bob Ross Marathon！
作為Slow TV觀眾，一定要推介任何Fireplace影片，燒到嘞嘞聲，好暢快。雖然而家睇住都覺得熱，但冬天欣賞一流！始終，喺香港住，真係無咩機會可以擁有一個火爐保暖。
%20(1).png)
