香港電影場景打卡入門|本地遊

本土娛樂遊

香港電影打卡入門

唔知大家近日有冇留意Netflix劇集《王冠》嘅最新動向呢?為咗配合劇情,劇組刻意喺倫敦還原香港街景。雖然香港係個彈丸之地,除咗本土製作,好多海外電影劇集都好鍾情香港嘅風景,隨時你樓下嘅街口都係某套電影嘅取景地。今次社職就會為你介紹一下喺香港搵到嘅電影打卡位。

杜琪峯鏡頭下的香港

杜琪峯(杜Sir)鏡頭下有唔少港島靚景,例如《文雀》嘅場景見到中環砵典乍街「石板街」、中上環新紀元廣場;而《大隻佬》中,張柏芝喺深夜等待大隻佬劉德華而得知「因果」嘅經典一幕,背後嘅紅磚屋就係香港中華基督教青年會必列者士街會所。

杜琪峯 文雀 石板街
截圖自《文雀》
杜琪峯 大隻佬 紅磚屋
截圖《大隻佬》

文青最愛──中環至半山自動扶手電梯

有睇開王家衞嘅電影,一定記得電影《重慶森林》入面有一幕,王菲跪喺扶手電梯,望住玻璃外面,同埋梁朝偉喺電影入面嘅屋企都喺呢條扶手電梯隔離。呢條扶手電梯,其實位於中環至半山自動扶手電梯,同時亦係全世界最長嘅有蓋扶手電梯!聽聞梁朝偉嘅屋企場景就喺閣麟街嗰一段。

王家衛 重慶森林 中環半山電梯
截圖自《重慶森林》

就連許鞍華《得閒炒飯》亦經常出現呢條中環至半山自動扶手電梯!

許鞍華 得閒炒飯 中環半山電梯
截圖自《得閒炒飯》

當年情──美華工業中心停車場

吳宇森的《英雄本色》當年紅遍亞洲,為咗同兄弟一齊東山再起而落魄三年嘅Mark哥令我哋心生嚮往。電影入面,周潤發飾演嘅Mark喺台灣畀人打斷腳之後,返去香港工作嘅地方就係土瓜灣美華工業中心嘅停車場。停車場入面仍然保留當年舊式嘅告示牌同設計,非常懷舊。

吳宇森 英雄本色 美華工業中心停車場

英雄電影朝聖地──「雷生春」

《蜘蛛俠》上映如火如荼,奇異博士今集都有出場。大家記唔記得《奇異博士》入面,有一場打斗場面係發生喺「香港」呢?其實劇組礙於成本同人流管控而選擇喺片場大規模搭建香港街景,而靈感來源就係廟街同九龍周邊一帶,其中「香港聖所」嘅設計靈感就係非牟利機構經營嘅中醫診所雷生春

香港嘅電影打卡位點只咁少,有興趣可以留意社職以下介紹嘅Youtube Channel 同 Facebook Page,佢哋會不定期考古港產片取景地。

HEBEFACE

電影朝聖 Film Pilgrimage

不過,社職提提你打卡還打卡,唔好影響附近嘅人使用設施,同埋注意自己嘅安全,更加唔好為咗打卡闖入一啲私人用地!

查看關鍵字的相關文章