新界一日遊全攻略|18區Chill Chill 香港好去處 x 社職文化系列

mins read
August 6, 2021

[全攻略]新界一日遊 x 香港好去處

社職文化系列之18區Chill Chill

第一回:新界好去處

>> 新界一日遊 <<|>> 港島一日遊 <<|>> 九龍一日遊 <<|>> 離島好去處 <<

香港人,除咗返工、返學,你最常去嘅地方係邊區呢?雖然話香港好細,但相信唔少市民都未必去過晒全港18區,而且對某啲地方有好刻板印象。

其實香港每個地區都有好地方畀大家chill下、玩下、食下,輕鬆過一日。社職將全港18區好玩地點,分別整合成18條一日遊建議路線,適合所有香港人去行下,認識下香港文化同靚景,Let's GO!

新界一日遊 18區Chill Chill

元朗一日遊-草泥馬帶你食菠蘿

元朗,其實有好多得意地方畀你relax。呢條路線唔只帶你去搵草泥馬食菠蘿,仲可以行室內市集、嘆杯咖啡,最尾仲可以去「錦田天空之鏡」影靚相!

元朗好去處一:有機薈低碳農莊

位於元朗錦田錦河路四排石村嘅有機薈低碳農莊以有機菠蘿作主題,擁有菠蘿種植場及菠蘿精品店,你可以喺到自製新鮮菠蘿小食。呢個農莊引入咗四隻嚟自澳洲嘅羊駝(草泥馬),歡迎園內買飼料餵佢哋兼同佢合照!

  • 地址:元朗錦田四排石
  • 開放時間:10:00-18:00
  • 交通:港鐵錦上路站A出口直步行約3分鐘,穿過行人隧道,左轉就會見到指示牌進入農莊,路程只需有6分鐘
  • 收費:請於官網或致電查詢
元朗好去處一:有機薈低碳農莊

元朗好去處二:錦上路跳蚤市場

週末星期六、日或公眾假期,港鐵錦上路站外面會有跳蚤市場,過百間小檔畀你慢慢睇。你可以喺到搵到各種雜貨、自家手作、特色零食、衣服等。

  • 地址:港鐵錦上路站
  • 開放時間:10:00-20:00(星期六,日及公眾假期)
  • 交通:港鐵錦上路站B出口
  • 路線:由有機薈低碳農莊出發,穿過行人隧道返回錦上路地鐵站,B出口一出即到,路程只需有7分鐘
元朗好去處二:錦上路跳蚤市場

元朗好去處三:紅磚屋市集

市集由蠟燭廠改建而成,內部係一個室內市集,接近有50間小店,有懷舊、有古董、有手作仔等。

  • 地址:錦田錦上路祠堂村旁
  • 開放時間:10:00-20:00(星期六,日及公眾假期)
  • 交通:港鐵錦上路站B出口
  • 路線:由錦上路跳蚤市場出發,沿錦匯路直行,出到錦上路即到,路程需12分鐘
元朗好去處三:紅磚屋市集

元朗好去處四:錦田壁畫村

村內多達46幅彩繽紛嘅壁畫都係由義工親手繪畫,遍佈喺錦田不同角落,你可以慢慢睇、慢慢影相。

  • 地址:新界元朗錦田吉慶圍(錦田公路側)
  • 交通:港鐵錦上路站B出口
  • 路線:由紅磚屋市集出發,沿小巷直行即到壁畫村,路程只需有3分鐘
元朗好去處四:錦田壁畫村

元朗好去處五:CoHee Studio

日系簡約裝潢,夠晒簡潔。除咗咖啡,亦提供多種輕食;不時舉辦手沖咖啡班、拉花工作坊,啱晒各位Coffee Lovers入嚟試返杯或者上下堂。

  • 地址:元朗錦田市街152號地舖
  • 營業時間:10:00-19:00
  • 交通:巴士54、64K至蒙養小學站下車
  • 路線:由錦田壁畫村出發,沿著錦田公路走,於錦田市街向右轉就會見到餐廳門口,路程只需有6分鐘
元朗好去處五:CoHee Studio

元朗好去處六:錦田水尾村

水尾村擁有特色靚景,包括樹屋、有錦田天空之鏡之稱「平湖」(影日落最佳地點)及被列為三級歷史建築嘅天后廟。

  • 地址:元朗水尾村
  • 開放時間:24小時(建議避免深夜時份參觀,以免打擾居民)
  • 交通:小巴601號至水尾村下車
  • 路線:由CoHee Studio出發,沿錦慶路直行,路程需10分鐘
  • 回程:天后廟前廣場坐601號小巴回錦上路站

大埔一日遊-走入秘密花園

今次去大埔唔踩單車,同你走入秘密花園、體驗綠色Staycation之外,仲喺附近嘆素食,過一個低碳假日!

大埔好去處一:綠匯學苑 Green Hub

綠匯學苑種滿植物,猶如一個秘密花園,適合大家嚟漫步放空,仲可以喺到Staycation!裡面有慧食堂畀你醫肚,仲有古典懷舊風嘅紅磚童軍中心(舊北區理民府),人流唔算多,你可以喺到慢慢影相。(溫馨提示:多花草樹木,建議自備防蚊用品。)

  • 地址:大埔運頭角里15號
  • 營業時間:10:00-17:00(逢星期二及特別日子休息)
  • 路線:大埔墟港鐵站A2出口,沿隔離隧道一直走,經過網球場後向右轉,直到莫壽增中學就會見到綠匯學苑門口,路程約6至8分鐘
大埔好去處一:綠匯學苑 Green Hub

大埔好去處二:香港鐵路博物館

香港鐵路博物館絕對係一個歷史文化博物館,有齊中式復古站台、展覽廳、歷史文物及圖片、火車模型等展示晒香港鐵路發展歷程。喺室外,你可以欣賞到1:1歷史車卡、蒸氣機火車頭、手動及機動工程車。

  • 地址:大埔崇德街13號大埔墟
  • 營業時間:09:30-19:30
  • 路線:由綠匯學苑出發,沿運頭街走,經過寳鄉邨寳康樓就會見到博物館門口,路程約8至10分鐘

大埔好去處三:V.W Vegan Cafe

行到肚餓,不如到附近商場一間田園風Cafe坐底食下嘢。呢到有Bagel、酸種包、蛋糕同飲品任你揀,格局舒適,非常適合你同朋友喺到慢慢嘆,抖一抖。

  • 地址:大埔寶湖道3號寶湖花園商場2樓227F-06號舖
  • 營業時間:(星期一)11:30-16:30/(星期二至四)11:30-20:30/(星期五六日及公眾假期)11:30-21:00
  • 電話:5466 9854
  • 路線:由香港鐵路博物館出發,往安富道朝懷義街前進,於廣福道向右轉,於寶鄉街向左轉,向右轉,於寶湖花園商場2樓就會搵到V.W Vegan Cafe,路程約8至10分鐘

北區一日遊-踩單車去湖畔Cafe

北區當然係戶外活動贏晒。呢條路線會建議各位單車代步,做運動鬆下筋骨;沿途更有幾個靚景畀你抖抖,包括湖畔Cafe、懷舊麵檔,踩完單車醫肚一流。

北區好去處一:上水單車匯合中心

  • 地址:大埔崇德街13號大埔墟
  • 營業時間:10:00-18:00(逢星期二休館)
  • 價錢:$100 全日(注意:還車時間為18:45,遲到半小時要罰款)
  • 路線:上水地鐵站A3出口,往新豐路行,然後轉入金都海鮮酒家旁巷子,一直走就會見到單車匯合中心,路程約4至6分鐘

北區好去處二:雙魚河大水管

踩到咁上下,可以喺大水管停低休息,望住無遮無擋嘅天空,一流靚景。

  • 地址:梧桐河至雙魚河交界
  • 路線:往新豐路朝符興街前進,沿單車徑踩出「寶石湖路」上天橋,下橋後到彩園路要過隧道,之後到工業區,途中會有清晰指示叫你過天橋,喺雙魚河休憩處過橋後往右邊踩就會到大水管,路程約26至30分鐘
北區好去處二:雙魚河大水管

北區好去處三:何時 • 河地 | Anytime • Anywhere

踩踩下想認真抖抖,你可以到附近一間湖畔Cafe。有木屋室內座位,亦有露天茶座,坐喺池塘邊、鞦韆座椅;食物就以簡單為主,例如咖喱魚蛋、公仔麵、柚子醬西多士及椰汁紅豆冰。望住個湖同藍天享用午餐,夠晒Chill。

  • 地址:上水河上鄉公厠附近
  • 營業時間:12:00-18:00(逢星期三休息)
  • 路線:離開大水管後沿路折返,回到剛才路口沿雙魚河走,踩17分鐘到河上鄉公厠,再進入就見到何時 • 河地,路程約需17至18分鐘)
北區好去處三:何時 • 河地 | Anytime • Anywhere

北區好去處四:珍苑麵家

還完單車,仲係好肚餓?可以試附近一間街坊堅撐嘅老麵店,牛腩、滷水雞翼、蠔油冬菇非常之出名,值得一試!

  • 地址:上水馬會道148號B舖
  • 營業時間:10:30-19:00(逢星期三休息)
  • 電話:2672 7832
  • 路線:由上水單車匯合中心出發(還完單車後),往新豐路朝符興街前進,於符興街向右轉,於馬會道向右轉就見到珍苑麵家,路程約需5至7分鐘

葵青一日遊-翻轉工業區

葵青區唔係只得返工嘅工廠大廈,呢到仲有好多靚景等你慢慢行。你可以選擇室內充滿文藝氣息嘅活化工廈、亦可以漫遊公園,或者挑戰自己去自然徑行山,享受戶外大自然靚景。

葵青好去處一:活化工廈 - Life@KCC

葵興有好多工業大廈,但因近年活化工廈興起,葵興其中一座工廈改建成新景點「Life@KCC」,加上同本地藝術家Messy Desk合作,注入文藝氣息。

  • 地址:葵涌葵昌路72至76號
  • 開放時間:09:00-22:00
  • 交通:葵興港鐵站E出口直達
葵青好去處一:活化工廈 - Life@KCC

葵青好去處二:新都會商場

新都會商場咩店舖都有,仲不時有限定主題活動吸引人流,想抖下冷氣又想shopping,呢到啱晒。

  • 地址:葵涌興芳路223號
  • 開放時間:10:00-22:00
  • 交通:葵芳地鐵站E出口,行人天橋對出步行1分鐘

葵青好去處三:葵涌廣場

行到肚餓又唔想喺大商場入邊等位?你絕對可以去隔離葵涌廣場,連接新都會廣場、葵芳邨,極之方便。入面各種平民美食任你揀,慢慢發掘啦!

  • 地址:葵涌葵富路7-11號
  • 開放時間:12:30-22:00
  • 交通:葵芳地鐵站D出口步行2至3分鐘
葵青好去處三:葵涌廣場

葵青好去處四:青衣公園

行完商場想靜下,可以考慮去公園接觸大自然。位於青衣城附近嘅青衣公園係一個非常適合你去放鬆嘅地方,周圍有茂盛花草樹木,仲有一個瞭望台畀你欣賞成個公園,加上個人工湖靚景,好適合鍾意攝影嘅朋友。

  • 地址:青衣島青敬路
  • 開放時間:05:30-23:30
  • 交通:青衣地鐵站B出口步行5至10分鐘
葵青好去處四:青衣公園

葵青好去處五:青衣自然徑

如果你想行山,可以試行呢條青衣自然徑。唔只景色優美,沿途仲會見到成條天馬大橋及無敵海景。呢條路唔算難行,適合少經驗嘅行山人士嘗試。

  • 地址:青衣自然徑
  • 開放時間:24小時
  • 交通:青衣站A1出口,搭248M號巴士(長宏邨下車),沿寮肚路步行,食水配水庫右邊,青衣自然徑北面入口
  • 路徑所經:1.青衣自然徑>2.青瞰徑>3. 青雲徑>4. 1號觀景亭>5. 青衣西路
葵青好去處五:青衣自然徑

西貢一日遊-保齡與海

入到西貢唔想搭船出海,可以做咩?打保齡,有得食埋飯!仲有專為小朋友而設嘅打保齡神器,啱晒一家大細去玩!你亦可以選擇靜靜地,沿西貢海濱漫步,慢慢揀餐廳食晚餐。

西貢好去處一:Tikitiki Bowling Bar

Tikitiki Bowling Bar有 10 條室內賽道,更有專為小朋友而設嘅輔助打保齡神器,令一家大細都可以玩得盡興。呢到仲有得食埋飯,你可以揀坐室外,望住靚景享用美食。

  • 地址:西貢翠塘路1A號Centro4樓
  • 營業時間:星期五至日及公眾假期 12:00-22:00
  • 路線:西貢碼頭公共小巴總站搭1S小巴,到第2個站翠塘花園落車,再向前步行1-2分鐘
西貢好去處一:Tikitiki Bowling Bar

西貢好去處二:西貢海濱公園及西貢海濱市集(西貢海濱樂園購物天地)

打完保齡球又食完野,可以坐返小巴到海濱公園沿海旁吹住海風行下,放鬆身心。如果星期六及日去,你可以留意西貢區社區中心網頁睇下當日有無「西貢海濱樂園購物天地」市集,每期會有不同種類小商店、團體及機構參與,售賣各種特色手作產品。(可留意西貢海濱樂園購物天地 Facebook店鋪名單)

  • 地址:西貢美源街8號
  • 營業時間:逢星期六、日及指定公眾假期 11:00-18:00
西貢好去處二:西貢海濱公園及西貢海濱市集(西貢海濱樂園購物天地)

西貢好去處三:Momentai 無問題

行到攰想坐底,可以揀位於西貢海濱公園旁嘅Momentai 西式餐廳。坐喺室外仲可以一邊吹海風,一邊食嘢同朋友傾計;呢到面仲有好多非酒精特色飲品同小食,呢個周末夠盡興。

  • 地址:西貢惠民街2號海濱公園1號舖
  • 營業時間:星期一至日 12:00-23:00
  • 路線:往西貢新公眾碼頭行,就到Momentai 無問題,路程約2至3分鐘
西貢好去處三:Momentai 無問題

荃灣一日遊-新與舊的交響樂

荃灣區新舊並存,除咗近年極受歡迎嘅南豐紗廠之外,亦有特色村落、古蹟、更有歷史悠久嘅圓玄學院及三棟屋博物館,景點夠獨特又多元化,夠你行足一日。

荃灣好去處一:The Mills 南豐紗廠

由廢置工廈改建而成嘅南豐紗廠,而家已成為一個文化購物地標;不過,你依然可以喺裡面欣賞舊時工業一面,包括香港紡織工業嘅黃金時代等。南豐紗廠亦不時舉辦各種主題活動及市集,充滿Gimmick。

  • 地址:荃灣白田壩街45號
  • 開放時間:10:00-22:00
  • 交通:港鐵荃灣站A3出口/港鐵荃灣西站A2出口(詳情按此

荃灣好去處二:海洋探索體驗館

喺荃灣Plaza 88商場內有一個「浩海立方.探游館」,採用VR、AR及MR技術,提供多種視覺享受,體驗水族館氣氛。

  • 地址:荃灣西楊屋道88號Plaza 88
  • 開放時間:10:30-12:30/13:00-15:00/15:30-17:30/18:00-20:00
  • 交通:由The Mills步行二十分鐘/84小巴 (大涌道上車,眾安街下車)
南豐紗廠去海洋探索體驗館
荃灣好去處二:海洋探索體驗館

荃灣好去處三:光板田村

為港版彩虹眷村嘅光板田村係荃灣寮屋區,位於大帽山山腰,屬於荃灣一大特色!光阪田村係本地少數僅存嘅獨色村落,村內有好多由色彩繽紛嘅壁畫,可以當睇畫展。(注意:唔好騷擾到當地居民。)

  • 地址:荃灣光板田村
  • 交通:荃灣西站總站搭51號巴士於光板田村下段站下車

荃灣好去處四:蓮花山公共學校

如果你自問大膽,可以去呢間廢棄學校探索一下。蓮花山公共學校喺50年代初建成,直至80年代因停辦而被荒廢,但學校框架依然健在,只係被藤蔓和樹木包圍,特別顯得神秘怪異,適合大膽之人去探險兼影下相。

  • 地址:大欖荃灣蓮花山公共學校
  • 交通:光板田村上段站搭51號巴士於麥理浩徑下車,步行40至1小時

沙田一日遊-玩轉你個沙田

玩轉沙田集齊戶外運動地方之外,亦有支持可持續生活概念Shopping點──環保雜貨店,以及走入歷史悠久嘅圍村。最後,路線更帶你去2021年之蓮必比登推介餐廳嘆碗好麵!

沙田好去處一:沙田新城市廣場(New Town Plaza Sportzone躍動悠園)

沙田新城市廣場上蓋設有結合運動與休閒嘅戶外空中草地運動公園,有7個Fitzone,其設施動靜皆宜,適合男女老少使用。

  • 地址:新城市廣場1期5樓平台
  • 開放時間:(公園)07:00-22:00/(部分設施)11:00-19:00
  • 交通:港鐵沙田站A出口

沙田好去處二:環保雜貨店Slowood

Slowood主打走塑裸買食材及天然環保用品:不同種類有機食材同香料、天然護膚品及環保清潔用品。裡面採用零包裝購物及「裸買」模式,支持環保及天然健康嘅生活態度。

  • 地址:新城市廣場1期2樓241號舖
  • 營業時間:10:00-22:00
  • 交通:港鐵沙田站A出口

沙田好去處三:沙田中央公園

沙田中央公園係沙田新市鎮嘅主公園,沿河而建,所以你可以欣賞到城門河兩岸景色。園內分別有兒童遊樂場、露天劇場及藝術;而公園南面及北面提供一大片草地,你可以喺到野餐!

  • 地址:沙田源禾路2號
  • 開放時間:06:30-23:00
  • 交通:港鐵沙田站A3出口
  • 路線:由新城市廣場出發,沿著担杆莆街走就會見到公園門口,步行約8分鐘

沙田好去處四:大圍好湯好麵

粉麵小店「好湯好麵」獲得米之蓮必比登推介2021,不妨喺到嘆碗靚麵。

  • 地址:沙田大圍積存街20號地下
  • 營業時間:12:00-17:00及18:00-00:30
  • 交通:港鐵大圍站A出口
  • 路線:沙田中央公園出發,沿著城門河畔走,直到大圍道右轉再直去就會見到餐廳門口,路程約18分鐘
沙田好去處四:大圍好湯好麵

沙田好去處五:大圍村

原名積存圍,於明朝萬曆初年建圍,係沙田歷史最悠久及規模最大嘅圍村。圍門極具特色、建築仍保存古廟舊物,充滿歷史文化色彩,值得參觀欣賞。

  • 地址:沙田大圍積存街20號地下
  • 交通:港鐵大圍站A出口
  • 路線:由「好湯好麵」出發沿著積存街走,於積信街向左轉就會有小巷走到大圍村,路程約2分鐘

屯門一日遊-豪華黃金美食「屯」

屯門公路令你好忟?Relax!呢條路線係一條有得曬又有得食嘢放鬆嘅屯門一日遊:陽光與海灘、露天茶座;你亦可以去「平價小食天堂」掃街逐樣試,最後仲有睇日落一流嘅海濱長廊,perfect!

屯門好去處一:黃金海岸

黃金海岸有黃金泳灘、海岸商場、露天餐廳同Cafe。你想喺室內嘆世界又得,想享受户外活動曬下太陽亦得!

  • 地址:香港屯門青山公路-青山灣段18號
  • 開放時間:黃金海岸商場-10:00-23:00
    泳灘救生員當值時間-星期一至五:09:00-18:00/星期六、日及公眾假期:08:00-19:00
  • 交通:巴士路線52X, 53, 61M, K53 (黃金泳灘站下車,沿黃金泳灘徑走直達泳灘入口)
    輕鐵505線路 (於三聖站下車,需步行約15分鐘)

屯門好去處二:龍門居小食掃街

龍門居食街被稱為「平價小食天堂」,多款式又性價比高,適合想搵平靚正小食嘅你。

  • 地址:屯門龍門路43號龍門居地下
  • 交通:輕鐵610線路,於龍門站下車,步行約5分鐘
屯門好去處二:龍門居小食掃街

屯門好去處三:屯門海濱長廊

屯門海濱長廊又稱為「幻愛橋」,皆因香港電影《幻愛》曾經在此取景,所以呢到變成屯門打卡熱點之一。即使你對《幻愛》無興趣,呢到都值得你嚟,因為地點較隱世,你可以喺到享受寧靜,放鬆自己;你亦可以沿橋散步,感受海風,忘記煩惱。到黃昏,仲可以到海濱長廊盡頭觀賞日落美景,點影都靚。

  • 地址:屯門海濱花園
  • 開放時間:24小時
  • 交通:輕鐵 610, 615, 615P, 614P, 614, 507線路 (於屯門碼頭總站下車,需步行大約10分鐘到達海濱長廊)
  • 如你跟隨推薦行程由龍門輕鐵站出發,建議乘搭610線路列車,可直達屯門碼頭總站
屯門好去處三:屯門海濱長廊

18區Chill Chill 一日遊路線補充

  • 路線規劃之行程由義工協助進行搜集,並非任何商業宣傳
  • 路線規劃之行程只為建議路線,參加者可按照心情自行更改路線或行程
  • 實際路程和交通時間或與描述不同,資料只供參考
  • 所有路線資訊以官方公布作準

其他社職文化系列

>> 18區Chill Chill-離島好去處推介

>> 18區Chill CHill-港島一日遊路線推介

>> 18區Chill Chill-九龍一日遊路線推介

>> 宗教放題-香港廟宇一日遊

>> 宗教放題-本地佛寺及教堂一日遊